قصيدة لشاعر:محمد الدحيمي((فوز))

[صبي شهر]

فوز .. وش معنى الحياة وتالي الحـيّ التـراب؟
مقبـره .. والمـيـت والله مـاتـردّه مقـبـره
فوز .. لا صرتي مره تدرين ليـه الظـن خـاب
وليه أبونا آدم مـن الجنـة خـرج سبّـة مـره
فوز .. ما تروي مهاميـه الـزراج إلاّ السـراب
والهبوب الذاريـات أصفـى ملامحهـا .. غبـره
فوز .. ويش الصاعقة تأخذ من البيت الخـراب ؟
والأمل كهلٍ بكى .. يومن ضحـك شيـب شعـره
فوز .. لو تطمن مشاريـف النوايـف للهضـاب
واستوى الغارب مع حدب السنـام اش نخسـره ؟
لا الذّره كانت ذنوب .. ولا الرحا منْ الذنب تـاب
وحكمة الله يالرحا .. تاطـا علـى خشـم الـذّره
والبعير ليا ِدبَـرْ ظهـره نقـض ِدبَـرْه غـراب
وان شكا ضيم اظهره .. وش بالبعير الاّ اظهره ؟
الرضا -- ماله صديق ليا زعل .. غيـر العتـاب
والعفو -- مالـه عـذول .. الاّ مـلام المقـدره
كيف يالتوبه حضورك يبـري جـروح الغيـاب ؟
واطهرك .. ذنـبٍ يصـك البـاب دون المغفـره
يابْعدي .. والظن ظنّ ولو فتق صـدر الصـواب
وابسـط اقـدار المنايـا : كـلّ جمـع تبعـثـره
قالهـا اللـي راح يستسقـي شهاليـل السحـاب
ابـدويٍ كـان يطفـي القيـض بظـلال شْجـره
ان ذكر حيّه .. وسَمْ دمعـه علـى ردون الثيـاب
وان ذكر ميته .. عقـل زامـل ذلولـه وانحـره
وشاعـرٍ ماسخّـر اشعـاره لتلعـات الـرقـاب
اجـوديٍ .. ميـر دق الفقـر بـابـه واقـهـره
واقسمه نصفين حظّه نصف ..بآحـزان وعـذاب
ونصفه الثاني .. خـذاه المـوت يـوم استكثـره
مانشد ( يوسف ) عن الغـي وقميصـه والذيـاب
ما نشد ( يعقوب ) .. دمعه وش خذا من محجره ؟
راح يحدي له (حيالٍ ) واغفلت .. راحت .. ذهاب
مالهـا وصـفٍ يبينـه ( النبيـه ) ويضـهـره
مابقى الاّ ( فاطر ٍ) لاهي ( مسوح ) ولا ( ركاب )
لا ظمت .. تشـرب بجلـد حْوارهـا مستبشـره
المصيبـه لا رمـى الفـارس بصـدره للحـراب
مادرى انـه كـلّ حصنـي فـي بـلاده عنتـره
فوز .. لاصرتي مره -- تقرين صفحات الكتـاب
وتعرفين ان الزمـن رجّـال .. لاصرتـي مـره
وتعذرين اللـي قفـل حظّـه بوجهـه كـلّ بـاب
وانفتح له باب .. لكـن كـان .. بـاب المقبـره